歷時25年嘅越戰於七十年代中結束,但越南社會動盪未止,造成大批難民湧入香港避難。去到1979年7月,英國政府喺日內瓦簽署《日內瓦公約》,將香港列為越南難民嘅「第一收容港」,即係話所有越南逃出嚟嘅難民,會由香港先行接收,再分批轉送到外國。

直至八十年代,累積超過十萬名難民去到香港。90年代開始,香港政府開始遣返唔符合資格嘅越南難民,雙方爆發多次衝突。1992年今日係年三十晚,元朗八鄉嘅石崗船民中心嘅南越同北越人因買賣私酒同爭用熱水等問題爆發衝突,雙方用長矛、利刀、鐵通同汽油彈等武器喺營內互相打鬥、廝殺,最後演變成大騷亂。

騷亂規模之大,連駐守難民營嘅紀律部隊都未能控制場面,最後要出動大批著上防暴裝備嘅警員趕至營內鎮壓騷亂,直至第二日清晨時份先控制住場面。呢次騷亂中,有營房被燒穿頂,共造成24人死亡,130幾人受傷,係香港史上傷亡最慘重嘅越南船民騷動事件。

原圖嚟自網絡。