星光大道又開返喇,唔知大家有無去同隻金豬仔麥兜影相呢?今年係豬年,講到豬,又點可以唔講香港本土出產、有「最靚嘅豬腩肉」嘅豬仔——麥兜呢?麥兜雖然讀書唔叻、蠢蠢哋、鈍鈍哋,但就好乖仔、好孝順同好善良。相比起其他漫畫,麥兜嘅故事其實好簡單,佢貼地到幾乎每日都會發生喺我哋身邊,平凡、普通但就會令人發笑,有治愈嘅感覺。

不過,原嚟麥兜並唔係麥兜之母麥家碧第一隻畫嘅豬仔,麥兜嘅老表——麥嘜先係。喺九十年代起,「麥嘜故事」專欄開始喺《小明周》連載,由麥家碧插畫,負責寫故仔嘅係經理人兼麥家碧宜家嘅丈夫謝立文。麥嘜故事隨後大受歡迎,後嚟轉咗喺《黃巴士》上連載,之後仲陸續出版咗《麥嘜成年人童話》、《麥嘜天空飛豬》、《麥肉兜兜》等多本大人、小朋友都咁鐘意嘅漫畫故事書。《麥兜故事》2001 年被改篇做動畫,搬上大銀幕,自此麥兜、麥嘜呢兩隻豬仔唔單止紅遍香港,仲攞咗2003 年法國安錫國際動畫影展嘅「最佳電影獎」、台灣第39 屆金馬獎「最佳動畫片」等多地大獎。而麥兜嘅電影續集《菠蘿油王子》亦獲得香港電影評論學會大獎「最佳電影獎」等獎項,都咪話唔犀利。

講返麥家碧本人,原嚟佢同麥兜都有相似之處——都係咁簡單。畫畫係麥家碧嘅快樂泉源,麥兜電影賺幾多、可以從中獲得幾多名利,從來都唔係麥家碧關心嘅嘢。麥家碧同麥兜一樣,係比較內向嘅人,唔擅長交際,佢中意用圖畫同人溝通,好似剝咗牙,佢會畫個口,入面再加個大交叉,屋企人都習慣曬佢依種溝通方式。有時佢比較迷糊,唔識分老虎同獅子,甚至連幾時畢業同結婚,通通都唔記得。被記者稱為「宅女」嘅佢住响銅鑼灣,最遠去到灣仔同天后,連去中環都要不停問路,又會成日同屋企種嘅植物傾偈,希望佢哋快高長大咁話。就係因為有咁樣嘅一個「媽咪」,麥兜同佢屋企人、朋友嘅故仔先會俾到大家一種簡單、純樸嘅感覺。

原圖嚟自網絡。