早排响條街見到部勞斯萊斯,諗返起八九十年代兩位好搶眼嘅名人——周啟邦夫婦。周家曾經係香港四大家族之一,周啟邦嘅父親周錫年同伯父周埈年都係香港殖民地時代舉足輕重嘅人物,不過香港人對周啟邦印象最深刻嘅,反而唔係佢顯赫嘅背景,而係佢同太太譚月清出席唔同ball嘅盛裝打扮。

周啟邦同譚月清係青梅竹馬,兩人早喺去英國讀書之前就已經定情,周啟邦21歲喺劍橋大學畢業之後就即刻同譚月清結婚,自此相愛相守超過半世紀。夫妻兩人都係貪靚之人,婚後二人一有時間,就會去意大利同巴黎等地睇時裝show。有時睇中嘅名牌衫未必啱身,佢哋就索性搵專人度身訂造。為咗靚,佢哋有段時間寧願捱餓,都要用父母寄嚟嘅生活費裝身。

返香港之後,兩人幾乎係逢ball必到,佢哋每次嘅服飾都係自己設計訂造,驚豔全場,係一眾傳媒爭相追訪嘅目標,佢哋更喺「世界名人錄」中留名。譚月清自細中意粉紅色,認為粉紅色顯得佢嬌俏動人,所以周啟邦好多時候為咗襯返太太而著粉紅色,更為咗太太一個諗頭而將勞斯萊斯改成粉紅色。不過周啟邦自己嘅心水色就係金色,唔單止將自己嘅大屋裝修成「金色之家」,連座駕亦改成金色。樂壇組合Twins嘅《夢想黃金屋》都曾經去過周啟邦間「黃金屋」取景。雖然外界對兩夫婦獨特搶眼嘅造型有讚有彈,不過周啟邦講過,只要過得到自己,就無須理其他人嘅看法,做自己認為啱嘅事。

除咗服飾、屋企同座駕與眾不同之外,周啟邦嘅家世一樣咁顯赫。佢嘅父親周錫年喺香港大學醫學系畢業之後,遠赴英國攻讀眼科,1930年回港成為全港首名耳鼻喉科醫生。周錫年1946年踏足政壇,先後晉身立法局同行政局,1960年更獲英女皇獲爵。唔單止咁,周錫年當年係少數獲准住山頂嘅華人,仲曾經係牛奶公司、九巴同華人銀行嘅大股東,又係賽馬會董事。周啟邦喺咁嘅家庭長大,反而無繼承家族從政嘅傳統,只係聽從父命攻讀法律,後來做咗律師開埋律師行,90年代退休之後就開始享受退休生活。周啟邦2008年患上淋巴癌,最後喺2010年2月病逝。

圖為周啟邦夫婦以及Twins嘅《夢想黃金屋》MV,原圖嚟自網絡。