住港島嘅史友對「壽臣」呢個名一定唔會陌生,壽臣山、壽臣山道仲有灣仔嘅壽臣劇院等,都係以「香港大老」周壽臣嘅名嚟命名,究竟周壽臣有咩威水史令佢留名青史?等阿史宜家話你知。

周壽臣原名周長齡,係香港黃竹坑新圍人,少年時期被父母送去中央書院接受西方教育,後嚟仲被清政府選中成為第三批留美學生之一。回國之後,周壽臣得唔到重用,曾經加入當時仲係大清駐朝鮮總督嘅袁世凱麾下效力,輾轉任職署理仁川領事、關內外鐵路總辦等職位。

辛亥革命之後,袁世凱便出任大總統,不過周壽臣無繼續跟佢,反而辭官同老婆仔女返香港。返到自己地方,周壽臣認為要大力發展香港嘅教育,於是馬上聯合嘅華商認捐籌集資金,創建香港大學堂。而佢嘅閱歷同人際網絡,亦令佢得到港英政府重用,1907年被授予太平紳士頭銜,1919年更成為潔淨局官員。從政之外,周壽臣喺1918年聯同李氏家族要員李冠春、李子方同簡家簡東浦等華商合資創辦東亞銀行,仲擔任主席30幾年。

去到1921年,年過60嘅周壽臣被委任為定例局官員。1925年省港大罷工期間,身為華人領袖嘅周壽臣更協助港英政府穿梭兩地調停。翌年,周壽臣被英王喬治五世冊封為爵士,係繼何啟、韋玉、何東之後嘅第四位華人爵士。同年,時任港督金文泰委任周壽臣為華人史上第一名議政局議員,自此周壽臣成為縱橫政商兩界嘅重要人物,被冠以「香港大老」稱號。港英政府為咗表揚周壽臣對香港嘅貢獻,將周壽臣住宅所在嘅山頭命名為壽臣山,更將佢嘅大屋命為「松壽居」,而環繞「松壽居」嘅街道就命為壽臣山道。

圖為壽臣山道,原圖嚟自網絡。