馬航MH370客機失蹤五年,至今仍然未搵到客機嘅蹤影,有唔少家屬相信機上嘅親人仍然在生,多年來一直四處奔走,希望馬航同當局繼續尋找客機下落。大馬方面早幾日表示,如果打撈公司有可靠嘅線索,願意討論搜尋方案,並對再次搜尋MH370持開放態度。

喺2014年3月8日凌晨,馬航MH370客機載住包括154個中國乘客在內共239人,由吉隆坡飛去北京。但架飛機唔夠一個鐘就喺雷達消失咗,期間正、副機長都無發過求救過訊號。事關多條人命,多國之後派人搜索,但都係搵唔到架客機。去到2015年中,法屬留尼旺島首次發現部分客機殘骸,後嚟繼續响南非、莫桑比克、澳洲等地相繼發現疑似殘骸。

不過到咗而家,依然無人知MH370點解失蹤,有人就猜測係機師自殺、有恐怖份子劫機等原因,仲有人聲稱架飛機係被人遙控咗去哈薩克、南極洲。種種傳聞同無結果嘅調查報告,都令家屬更加心痛。雖然經歷悲痛、無奈等多番煎熬,但唔少家屬仍然堅持落去,繼續尋找摯愛嘅親人,「信念不會動搖」。

原圖取自網絡。