遇上劫機事件,好多人都會好驚,但如果保持冷靜,就隨時可以避過一劫!喺1978年,中華航空一班由高雄飛去香港嘅航班發生劫機事件,當時飛機喺3月9日下午4點08分起飛,喺5點鐘左右,工程師機員施明振突然發難,用大鎚同鉸剪襲擊正、副機師,要脅佢哋將架飛機轉飛內地。

遇襲嘅正、副機師當堂大叫,機上兩個護衛聽到就即刻用滅火筒撞開駕駛門,並且開槍制止,施明振中槍倒地,最終班機喺5點20分順利降落,機上乘客全部無事。正、副機師送院治理,而施明振就證實不治。

發生劫機案期間,機上乘客都非常冷靜、有秩序,原來係多得空姐向乘客講咗個「善意」嘅謊言。當時空姐話飛機遇上氣流,叫乘客綁好安全帶同著上救生衣,最終航機安全降落,啲乘客見到有荷槍警員上機,先意識到發生大件事。

不幸嘅係,同一架飛機八年後由台北飛去澎湖,降落馬公機場時失敗,飛機打算重飛時在响附近海域墜毀,機毀人亡。

圖片為1970年代華航飛機,取自網絡。