上次講開東華早年幫手打擊「賣豬仔」,其實除咗幫助打工仔之外,東華都有出力阻止人口販賣、逼良為娼嘅問題。有記載話當時廣州有女仔被人用50蚊買落嚟,然後轉手响舊金山以1000蚊販賣,可見相關情況非常猖獗。東華當時就好似半個執法機關咁,會派偵探幫手調查,仲有權盤問涉案人士同被害婦女。

話說當時嘅情況同「賣豬仔」都幾似,香港政府要打擊誘拐婦女同迫良為娼嘅歪風,但執法部門發現部份婦女被威嚇要隱瞞事實,或者好驚同外籍官員傾計,於是就搵東華嘅人幫手,等啲婦女講出真相。當啲婦女被救出之後,東華亦會負責照顧佢哋,送佢哋返家鄉。

除此之外,1875年美國通過法例,拒絕有意去當地做娼妓嘅華人婦女入境,於是邀請東華幫手做查核工作,了解去當地嘅婦女係咪被迫或者被呃去美國,以及去美國會唔會做娼妓,並講返畀領事知。最後得到東華嘅證明,婦女先至可以去美國。後來加拿大亦都搵咗東華採取同樣做法,防止華人婦女去當地賣淫。

原圖取自網絡。